The Crown - الملكة .. وأنا


تدوينة النهارده متأخر كتير الحقيقه، انا عايزة اكتبها من فتره لكن لسه مش قادرة ابرمج نفسي اني احدد مواعيد للكتابه، ما علينا أنا النهارده هتكلم عن الملكة أليزابيث الثانية " ملكة بريطانيا" واللي مدة حكمها لبريطانيا اكثر من 65 سنه واللي يقال ان مدة حكمها كانت أطول مدة حكم في التاريخ، لكن من وجهة نظري لما اتفرجت على مسلسل The Crown اللي بيتعرض علي Netflix المسلسل دا غير نظرتي لشوية حجات فعلي سبيل المثال وليس الحصر ..

"مجتمع ذكوري بطبعة"

مشكلة ان ست أكثر نجاح من الراجل. مشكله لكن لما تبقي الست دي مراته تبقى واقعة مطينة بطين، اه والله يعني الناس اللي بتقول ان الأجانب اكثر تفتحا وتفهم لدور المرأة "الكلام ده تقوله في المحكمة تنزل بيه مانشيت في الجرايد" لكن الواقع مختلف تماما.
الواقع بيقول ان حتى رجال بريطانيا العظمى "المملكة التي لا تغيب عنها الشمس" كانوا حافظين نفس ذات المانيوال الرجالي اللي عندنا تقريبا دا مانيوال عالمي، يعني جوزها ماشى على نفس الخطوات خيانه، ينام في اوضه لوحده، طول الوقت ضارب بوز، مبيسبش فرصة انه يقلل من شأنها تعدي كده بسلام، من الاخر كده نكد نكد نكد طول الوقت، دا غير باه كبار الدولة حدث ولا حرج.

العلاقات الإنسانية هي الأكثر تعقيدا.

انا لما بتحط في موقف شغل، بدير الموضوع وانا مغمضه لكن في علاقتي بالبشر فأنا اخر خيابه ودي عقده من عقد حياتي، اكيد مش هشبه نفسي بملكة بريطانيا لكن لما شفت قد ايه انسانه العالم بينحني لها احتراما وقادرة على إدارة شئون بلد في وقت حرب، وتيجي في علاقتها باختها اللي كانت عاملا لها مشاكل كل شوية وأمها وجوزها وتغرق في شبر ميه؟! خلاني أتأكد بما لا يدع مجال للشك ان الست صعب عليها تنجح في الإثنين. يا تبقي strong independent يا تنجح في حياتها العملية.

وقوتها تلاقيها في ضعفها.

الملكة اليزابيث مسكت الحكم وهي 21 سنة وطباعها كأبنه كانت خجوله وهاديه البنات الكيوت دول عكس اختها خالص، ولما أصبحت ملكة دا اثر عليها طبعا في تعاملاتها وخاصة مع الحكومة ومع رؤساء الدول الاخرى، لكن دا مخلهاش تتخلى عن منصبها ولكنها اشتغلت على نفسها كتير جدا، وكانت بتقابل كل تعليق سلبي انها تشتغل على نفسها، موقفها مع جاكلين كاندي لما اتريقت عليها وقالت فيما معاناه هي دي ملكه دي اخرها ست بيت، كان ردها عليها مدرسة لأنها مردتش في تصريح ولا ادت اي اهتمام بالموضوع لكنها عزمتها وعرفتها غلطتها بالأدب.
ولا تعاملها مع تشرشل، واكيد المتعارف عليه قد ايه تشرشل كان شخصيه جامده وازاي انها قدرت تخليه يحترمها ويكون سند ليها دا من وجهة نظري منتهي القوة، حتى قراراتها مع جوزها، انا مع كل موقف مبلاقيش غير ايوه بأه انا أشجع اللعبة الحلوة ونرفع القبعة وننحني احتراما، ودا درس مهم في الحياه مش معني انك ضعيف او من وجهة نظر اللي حواليك انت اقل من المنصب تقدر تنجح لو انت عايز.

التاريخ من وجهة نظر أخرى.

اتعودنا اننا لما نشوف حكام بلادنا يكونوا ما شاء الله عليهم ملايكه وناقص جناحين، لكن لما بتشوف التاريخ من وجهة نظر الناحيه الثانيه اكيد الوضع بيكون مختلف، بغض النظر ان الممثل اللي عمل دور عبد الناصر كان مستفز اخر حاجه، لكن لطيف انك تشوف الحدوتة من وجهة نظر حد تاني، بيخليك تفكر برضو غير لما تتفرج علي المسلمات.

اجمالا المسلسل حلو جدا. التصوير والموسيقى والملابس الحقيقه حلو جدا انا في انتظار الموسم الثالث، وعلي فكرة يا جماعة الدراما قد تكون دروس حياتية مفيدة. يلا اروح اتفرج على باقي مسلسلاتي:)