انا مين؟


الإسم رشا خليفة ...
بني ادمة عادية جدا ويمكن أقل من العادي كمان الفرق الوحيد هو اني لما بحط حاجه في دماغي لازما وحتما ولا بد أعملها ولا أعرف المستحيل :)

حياتي اعملية كانت عادية جدا كل همي في الحياه اني اشتغل واقبض مرتب كويس يعيشني عيشة كويسة وبس طبعا من ساعة تخرجي كان ليا صولات وجولات في البحث عن شغل اشتغلت حجات كتير واتعلمت حجات اكثر لكن عشقي كان للعلاقات العامة وعقلي بيفكر تسويق .. في 2008 دي كانت اول منعطف تاريخي في حياتي لما رحت الجامعة الامريكية ادرس إدارة ولقيت قدامي العلاقات العامة والتسويق ولأن كانت دراستي علي حساب الشغل اضطريت اني ادرس علاقات عامة وتسويق علي حسابي الخاص.. ومن هنا كانت البداية.

حسيت اني لازم اشتغل الحاجه اللي بحبها وشاطره فيها مش مهم هكسب كام المهم اني اكون مبسوطة باللي بعمله ... وقد كان يا سادة اشتغلت وسددت كل ديوني وقررت ان اول ما اوصل 35 مش هشتغل عند حد وهيبقي عندي براند اسمه رشا خليفة وابتديت اطبق كل اللي اتعلمته في اني اكبر البراند دا .. ولان لكل مجتهد نصيب ربنا وفقني وقدرت احقق اللي عايزاه والبراند دا اصبح ليه شهره مش بطاله :)

انا مؤمنه ان العلم مش حكر علي حد وعلشان كده بحاول دايما اسااعد اللي حوليا باللي اتعلمته .. واسعد اوقات حياتي لما بلاقي حد عرف مني معلومة ولا كنت سبب في انه يعرف حاجه جديدة .. 

دلوقت انا عندي شركتي الصغنونه في العلاقات العامة وبجتهد علشان اكبرها واملي اني زي ما نجحت قبل كده انجح تاني هي الحياه كده الواحد لازم يلاعبها ويلعب معاها ومع كل تحدي جديد .. بكتسب مهارات اكثر وأكثر.

دي مدونتي المتواضعة اللي فيها كل اللي كتبته وقلته طول السنين اللي فاتت اتمني تكون ليها فايده ليكم ..

منورين مدونتي :) 
رشا خليفة