حكايتي مع المسلسلات

زمان لما ماما الله يرحمها كات تبقي متابعة مسلسل اوي وانا احس ان يعني لازمة المسلسل كنت بحب البرامج اكثر كانت تقولي  ..

المسلسلات دي مش جايه كده من العدم ولا المؤلف جاب القصة من وحي خياله .. طبعا هو بيستخدم خياله في الحبكة لكن في النهاية المسلسات دي جايه من الحياه اللي احنا عايشينها بمشاكلها وفي النهايه يا بتتعلمي حاجه جديدة يا بتستفيدي خبره حياتيه يمكن مش هتقدري تعيشيها .. 

محستش دا غير لما ابتديت اتابع مسلسلات وبرامج بعينها وبدون وعي لقيتني بختار اتابع المسلسلات والبرامج اللي ممكن تساعدني في شغلي وحياتي بشكل عام. 

لدرجة ان دلوقت الناس بتبعت تسألني يتفرجو علي ايه؟ 

زمان كنت مشتركة في OSN علشان اقدر اتابع مسلسلاتي في نفس وقت عرضها عالميا، وفي 2008 اشتريت تلفزيون سمارت وابتديت اتابع تطبيقات التلفزيون زي شاهد،  Netflix،  StarzPlay – wavo . وطبعا اليوتيوب 

خلوني اكلمكم عن مسلسلاتي وأنا مقسماهم فئات منها اللي تتفرج عليه مع قهوة الصبح ومنها اللي يساعدك في الشغل ومنها اللي يساعدك في مجال معين ومنها اللي تتفرج عليه علشان تكمل مع ظغوط الحياه بتاعت كل يوم، بصو يا جماعة انا فعلا مش مافورة في الموضوع هو انا بس بهتم بالتفاصيل وكل تفصيله في المسلسل بفكر فيها وبطلع منها بخبره تفيدني.

دي شوية مسلسلات من اللي بحبها .. وفي مسلسلات عايزة قاعدة وكوباية شاي علشان نتكلم فيها دي هنحكي عنها بالتفصيل بعدين 

1- How to Get Away with Murder 

دا ينطبق عليه مثل اللي يشوف بلاوي الناس تهون عليه بلوته كمية المواقف اللي بتحط فيها بطلة المسلسل مش طبيعية ومع كل وقعة انت كمشاهد تقول بس خلاص مش هتعرف تتصرف مفيش حل تلاقيها طلعت بحل من تحت الأرض المسلسل هايل علشان يدربك علي ادارة الأزمات وازاي ان مع كل موقف منيل بستين نيله تحله كده وانت باشا دا غير علاقتها بفريق العمل ازاي انها خلقت تيم من العدم وازاي كل واحد فيهم عارف يعمل ايه امتي مش مستني مديره يقولو يلا يا ابني اشتغل

2- Once Upon a Time 

برغم ان المسلسل يبان فانتازيا وحركات وحواديت وكده، لكن بيلعب في دماغك البخت الصراحة لو ركزت معاه، اولا هو شقلب الحواديت وكل تراث اجدادنا من الحكايات اتشقلب فوقاني تحتاني، مثلا سندريلا اصلا كانت رايحة الحفلة تقتل الامير، وسنو وايت خلفت سوان بتاعت بحيرة البجع، اللي اساسا اتجوزت هوك وخلفت منه ولد يا نهار شقلبة المسلسل تحفة نظرتك للخير والشر هتختلف كل شرير جواه طيب خايف يظهره علشان يعرف يعيش فكر في الجملة دي واتفرج عالمسلسل وغير مفهومك عن الحياه والعلاقات واتعلم متحكمش علي حد.

3- The Vampire Dairy 

 المسلسل اللي غير وجهة نظري في الفامبير وخلاني بتمني اتجوز فامبير الصراحة، المسلسل برضو هيلعب في دماغك البخت في موضوع الخير والشر والتغيرات العجيبة اللي بتحصل للشخصيات، ولا ايلايجا .. دا برنس الفامبايرز 😊 يخش الخناقة من دول كسر رقبة وفي الاخر يطلع منديله بمنتهي الرقي تحس انه برنس في نفسه كده، المسلسل حلو اوي واللي حلو برضو ابنه الصغير مسلسل The Originals كلنا فامبيرز في بعضينا يا جماعة، المسلسل فيه عنف لكن مقبول مش رعب يعني هو اجتماعي اكثر.

4- designated survivor  

دا مسلسل اتفرجت عليه بالصدفة لكن طلع تحفة الصراحة تخيل ان يحصل انفجار في البيت الابيض وكل اعضاء الكونجريس والرئيس يموتو ويكون الوحيد اللي ممكن ينوب عن رئيس امريكا هو اقل واحد في السلم الوظيفي .. المسلسل فيه دروس كتير في كيفية ادارة الازمات، اتخاذ القرار ، العلاقات العامة تقريبا مفيش حلقة مفيهاش درس مستفاد.

نكتفي بدول النهارده والباقي هكلمكم عنه بعدين علشان ارهقت الصراحة وعايزة اقوم اهدي اعصابي بمسلسل Gilmor Girls وانام علشان غدا مليان تسكات كتير .. قبل ما امشي انا مبسوطة اني رجعت اكتب في المدونة تاني تشجيع بأه وتصفيق وتعليقات من بتاعت عظمة علي عظمة علي عظمة وكده نايتي نايتي