بعمل إيه؟!

دايما لما حد بيسألني بعمل ايه بيجي في دماغي مشهد مسرحية "إلا خمسة" لما ماري منيب سألت عادل خيري 
"انتى جايه اشتغلى اية ؟ " 
الحقيقه انا بشفق عي الناس اللي تعرفني لانها فعلا حاجه تلخبط :) لان طول حياتي المهنيه كنت بشتغل حاجه وبعد المعاش بقيت بشتغل حاجه تانية خالص ... مطولش عليكم خليني اشرحلكم انا بعمل ايه بالظبط؟

الموضوع ببسطه هو ان أنا وظفت كل مهاراتي واللي اتعلمته في التسويق والعلاقات العامة علشان اطبقه علي البني ادمين بإختصار كده انا شايفه ان كل بني ادم هو "براند" ودور كل واحد فينا انه يشتغل علي البراند دا بطريقة كويسه علشان يقدر يوصل للي هو عايزه.. سواء كان وظيفة او مشروع او احتي لو بيدور علي بنت الحلال فانا دايما بقول...
"هي الحياه ايه غير شوية PR وشوية Marketing متلخبطين علي بعض"
 ودا في الواقع كان موضوع كتابي شركة إسمها أنا وشغلانه في 10 أيام .. الحقيقه رحلة البحث عن عمل بتعتمد بشكل كبير علي البراند "انت".

وكانت كل مقالاتي في اليوم السابع وكلمتنا وكايرو دار وحتي مدونتي ماشيه في هذا الإتجاه ...

لكن شغلانتي الأساسية وعشقي الأول هي العلاقات العامه وعلشان اكون أكثر تحديدا ال "Online-PR" ودا موضوع كبير جدا هبتدي اكملمكم فيه في الفتره الجايه ...

انا بعمل إيه في دنيتي؟
  • طبعا بشتغل اللي هو العلاقات العامة 
  • بعمل ورش عمل وتدريب في "العلاقات العامة - ال Personal Branding - ريادة الأعمال - العمل من المنزل"
  • دا غير المبادرات والمسئولية الإجتماعية ومنها مثلا .. "شغلانتك في بيتك (جولة لتمكين المرأه في الصعيد) - ذاكر معانا - فعاليات شركة إسمها انا - وصالون رشا ... وحجات تانيه كتير"
هل يا تري يا هل تري عرفتو انا جايه اشتغلي ايه؟