دروس PR اللي اتعلمتها من Scandal ?!

سكاندال مسلسل امريكي ابتدي عرضه في 2012 وصلنا دلوقت للموسم السابع تقريبا ويعرض على قناة ABC، المسلسل بيتكلم عن أوليفيا بوب - شغلتها العلاقات العامة، وتحديدا مع الشخصيات العامة يعني متخصصة في الPersonal Branding هنبقى نتكلم عليه بعدين، انا من وجهة نظري المتواضعة هي شخصيا مثال حي لل Personal Branding، اوليفيا اشتغلت في إحدى الحملات الرئاسية وكان لها دور عظيم في اختيار رئيس امريكا وبعد كده سابت البيت الأبيض فتحت شركتها الخاصة لكن علاقتها بالبيت الأبيض لم تنتهي .. فهي استمرت في تقديم خدماتها لكن من خلال شركتها الخاصة.

كل حلقة من حلقات المسلسل درس علاقات عامة، يعني لو بتفكر تشتغل في مجال الـ PR المسلسل دا هو بداية الطريق، منها تسلي وقتك وتتعرف بشكل كبير على شكل المجال دا .. مش عايزة اطول عليكم خلونا نشوف ممكن نتعلم ايه من المسلسل.

البطل هو التدريب الاعلامي - Media Training

أوليفيا كانت بتركز جدا في تدريب العملاء علي الظهور الإعلامي وكيفية الإجابة على أسئلة الصحافة بشكل جيد، وكانت بتعرف تعلم العملاء مهارات التحكم في الانفعالات والارتباك بشكل كويس، المواقف في المسلسل اللي توضح اهمية التدريب الإعلامي زي لما طلع المرشح الرئاسي واعترف بخطأه قدام الشعب كله وكانت النتيجة لصالحه، او مرشحة الولايه اللي غيرت شكل ظهورها من ست كيوت لست تقدر تحكم ولاية وتتخذ قرار، أوليفيا كانت بترفض تصريح (لا تعليق) لان ده معناه إن أكيد عندك حاجة مخبيها ومحرج تقولها، وعلشان كده كانت بتدرب العملاء ازاي انهم يردو علي اي سؤال بدون استخدام تلك الجملة اللي من وجهة نظرها كانت سلاح قاتل لأي حوار.

إدراك الواقع

من المقولات اللي قالتها اوليفيا " إدراك الواقع أهم من الأدلة،إذا كان يبدو مدان فهو مدان .. الحقائق لا تعنينا الآن"

من الاخر يعني لو هو في نظر الناس عمل مصيبه يبقى هو عمل مصيبه ودي الحقيقة اللي لازم نشتغل عليها غالبا المواقف دي هي اللي بنسميها في مجال العلاقات العامة ( إدارة الأزمات - crisis management) .. طيب نعمل ايه؟

أولا .. تعامل بهدوء ءءءء ..

دي قاعدة أساسية في إدارة الأزمات انا ليا وجهة نظر بتقول "انت لو اتعصبت في إدارة الأزمة فكده الأزمة بقت اثنين" ولو العميل مش هيقدر يكون هادي يبقي يعين حد من فريق العمل يكون قادر على تمالك اعصابه والتعامل مع الموقف بهدوء.

ثانيا .. الأناقه ثم الأناقة:

انت لازم تكون انيق طول الوقت متعرف فين ممكن تقابل مين، المظهر شيء مهم جدا في مجال العلاقات العامة، فانت لازم تكون في كامل أناقتك طول الوقت.

ثالثا .. ثقتك في نفسك هي مفتاح النجاح.

غالبا بتوع ال PR يقال عليهم مغرورين لكن الحقيقة انهم بيكونو واثقين في قدراتهم ودا سبب نجاحهم في هذا المجال فإذا لم تؤمن بقدراتك الوظيفة دي مش ليك.

فريق العمل ..

انت مش بتشتغل لوحدك، فأنت لازم طول الوقت تقدر فريق العمل اللي بيشتغل معاك لان باختصار انت من غيرهم مش هتقدر تعمل كل حاجة، خاصة ان دي وظيفة مش سهلة كما تبدو، اوليفيا كانت بتقول علي فريق العمل عندها "Gladiators in Suits" يعني محاربين لابسين بدلة .. 

كن على معرفة ..

أوليفيا في حلقه قالت " انا بشوف الموقف من كل جوانبه"

وعلشان كده فريق العمل معها كان على درايه تامه بكل حاجه متابعين كل حاجه جرايد- تلفزيون - سوشيال ميديا - انترنت .. حتى لو ورقه مرميه في الارض لكن فيها معلومه مبتعديش، انت لازم تسبق الحدث ودي مهمه ال Monitoring في مجال العلاقات العامة.

اعمل الصح ..

يعني من الاخر متخافش ضميرك ولا تعمل حاجه عكس المتعارف عليه من أخلاق المجتمع، ولازم تراعي قيم المجتمع مهنة العلاقات العامة قائمة بشكل أساسي على إدارة السمعة ورأي المجتمع فاكيد مش هطلب من المجتمع يقتنع بيه وانا بعمل حاجه عكس قيم هذا المجتمع معروفة.

المسلسل حلو فعلا وانا بنصح الناس انها تشوفه، لانه فيه تفاصيل كتير ممكن تفيدك في تطوير مهاراتك المهنية وحتي علي المستوي الشخصي دا غيره انه مثير ومغامرات ومش هتحس بملل.

.