فريق العمل المثالي علي طريقه - SUITS

مسلسل Suits - البدلة .. من المسلسلات اللي انا مرتبطه بيها ارتباط عاطفي، كمية التحديات اللي موجوده في كل حلقة بتخليني ابص للتحديات التي تواجهني كأنها ولا حاجه، دا غير اني فعلا بستفيد من ابطال المسلسل كلهم في اكتساب مهارات إدارية خاصة أن كل واحد فيهم ليه طريقة مختلفة تماما في إدارة البزنس.

المسلسل بدأ من 2011 تقريبا انا متابعة المسلسل من وقتها وبستني كل موسم جديد بفارغ الصبر، المسلس بيحكي عن شركة من أكبر شركات المحاماة في نيويورك، بطل المسلسل مايك روس اللي هو اصلا مدخلش كلية الحقوق وقدر في مقابلة بالصدفة انه يقنع هارفي سبيكتر يشغله مساعد ليه لانه ودا بسبب ذكائه وقدرته على تحليل المواقف بسرعة دا غير ذاكرته الفوتوغرافية واللي بنظره واحده ممكن يحفظ كل اللي مكتوب قدامه، هارفي تحدي القواعد وشغله معاه والمواسم كلها بتدور في حل مشاكل الشركة والعملاء وفي سياق موازي حل مشاكل مايك روس لأن وجوده في الشركة مخالف للقانون.

زي ما احنا متفقين انا لما بتفرج على المسلسلات لازم اكون بستفاد منها :) والحقيقه انا شايفه ان المسلسل ينطبق عليه المثل بتاع "اللي فيه عين وراس يعمل عمايل الناس" يعني انت ممكن من متابعتك للشخصيات تقدر تتعلم منهم ازاي تشتغل احسن.

مايك روس .. الشاب اللي كان مقضيها يذاكر ويدخل يمتحن مكان زمايله علشان هم يجيبو درجات عاليه، ولما اتمسك راح لقريبه اللي دبسه في شغلانه مخدرات لكن هرب منها وحطته الظروف انه يقابل هارفي ويقنعه بمهاراته، عاجبني في مايك ثقته في نفسه وازاي انه بيقدر يحلل المواقف بسرعة ويستغلها احسن استغلال نقدر نقول عن علي مدار 7 مواسم مايك نادرا لما فرصه تعدي من قدامه كده منغير ما يستغلها ويستفاد منها، دا غير انه مبادر ودي مهارة مهمة اوي في اي موظف، غالبا المدير مش عايز الموظف اللي بياخد التعليمات بالمعلقة هو عارف ممكن يعمل ايه؟ وينجز.

هارفي .. في حوار بين هارفي ومايك هارفي قال وهو بيشاور بأيده 

"العالم كله هنا .. ورفع ايده لفوق وقال انا هنا" 

احيانا بحس ان دي الجملة المناسبة لأي حد شاطر في مجاله هي جملة مغرورة صحيح لكن قليل من الغرور لا يضر أحيانا، اهتمام هارفي بمايك درس يعني لما يكون عندك موظف كويس استثمر فيه، وكبره واكبر معاه "بس المهم الموظف يكون مقدر لدا" كميه المواقف اللي حصلت لمايك وهارفي وكل واحد فيهم مكنش يتخلى عن الثاني لا تعد ولا تحصي احيانا بتفرج علي المسلسل وادعي ربنا " اللهم ارزقني مايك روس علشان اعرف أكبر شركتي" بس في مصر اعتقد الموضوع صعب شوية ..

دونا .. دونا دي بأه الواحد مش عارف يقول عليها ايه، هي شاطره في كل حاجه فيها كل الصفات اللي انت محتاجها، مبادره عارفه كل حاجه بتحصل، عندها حل لكل مشكلة الشركة تواجهها، حتي المشاكل الشخصية بتاعت التيم هي عندها قدره فظيعة علي حلها، تحس كده انها الملاك الحارس بتاع الشركة.

لويس .. ودا بنبونة الحلقات كوميدي جدا، وتحس انه عايز كل حاجه لنفسه بيغير جدا من هارفي طبعا لانهم مش زي بعض، لكن بالرغم من كده فهو مش حقير يعني لما لما بيحصل موقف مصلحة الشركة بتيجي في الأول وبعدها اي حاجه تانيه.

رايتشل .. "اللي هي الأميرة ميجان ماركل" دي صديقه مايك و هتبقي مراته بعدين عاجبني في دورها ازاي انها اختارت انها تبني نفسها بنفسها بعيدا عن ابوها اللي يملك شركة محاماة كبيرة برضو لكن هي ماشيه بمبدأ " لن أعيش في جلباب أبي".

انا لو عندي فريق عمل زي دا اعتقد انا كنت قلبت الدنيا، الشركات مش بأصحابها ولا برأس مالها الشركات بالناس اللي شغالين فيها، بس احنا مع الأسف في مصر فعلا عندنا مشكلة في موضوع العمالة ودا اللي بشوفه مع كل اللي حواليا، انا نفسي الناس تتفرج على غيرهم وتحاول تعمل زيهم، يلا اروح بقى اتفرج علي الموسم الثامن .. المسلسلات لسه مخلصتش يا خبر ابيض دا انا عندي حكايات وروايات كتير كتير كتير .. يارب بس انتو متزهقوش.

من المقولات اللي عجبتني ..

لا يقدّم الرابحون أعذاراً في الوقت الذي يقوم الطرف الآخر بالتقدّم نحو الفوز - هارفي سبكتر

إدعاء تافه في اليوم الصحيح، أفضل من إدعاء عظيم في يوم خاطئ.- هارفي سبيكتر