جذب الحسد ؟!
انا من الناس الي مقتنعة الي حد كبير بقانون الجذب، مع اني لا قريت كتاب السر ولا شفت الفيلم، لكن مقتنعة الي حد كبير بان اللي بيفكر فيه البني ادم بيقدر يحققه لو هو مقتنع بيه فعلا ولا اخفيكم سرا انا شخصيا لما بكون مقتنعة بحاجه وبفكر فيها كتير بعملها وبتحقق.
طيب ايه علاقة الكلام ده بموضوع الحسد، الحقيقه ليا فترة بفكر في الموضوع نتيجة حبه مواقف بتحصل قدامي، ده غير الكلام الكتير اللي علي السوشيال ميديا من نوعية "متنزليش صورك علي السوشيال ميديا علشان متتحسديش" او اللي يفضل ينزل مشاركات تغزي العين :) انا شايفة ان في علاقة قوية بين قانون الجذب وبين الحسد، وده بيعتمد علي قوة الفكره، وده بيعتمد علي قناعاتنا، زي الأقتناع بالنجم الخفيف وان الحسد بيحصل علي اقل حاجه زي ما حسدو الغجر علي ضل الشجر مثلا؟!
وبناء عليه طول ما احنا بنفكر في الحسد وشاغلين عقلنا بيه وخايفين في كل خطوة علشان هيبصولنا فيها .. الخ هتكون النتيجة انه هيحصل، من فتره كنت مسافرة وقبل السفر كان الحوار داير حوالين باصين لنا في السفرية، ربنا يستر والسفرية تعدي علي خير لحسان العين علينا.. الخ اللي حصل اننا فعلا عملنا حدثة علي الطريق ورجعنا من نص الطريق والحمد لله اننا خرجنا منها علي خير، في الوقت ده مع اني بحاول اطرد فكره الحسد من عقلي علشان متسيطرش علي عقلي إلا ان الزن عالودان اقوي من السحر فكان كل تفكيري هو الخوف وربنا يستر ونوصل علي خير انا بعتقد ان كثرة الخوف انا عملت الحدثة لان عقلي من كتر التفكير جذب اللي حصل، قيس علي الموقف ده مواقف كتير جدا بتحصل في حياتنا، الحياه بيحصل فيها مواقف كتير لو فكرت شوية هتلاقي ان ليك دور بطريقة ما في اللي حصل، وده نتيجة الخوف اللي بنحس بيه تجاه الموقف.
الخوف هو الشعور الناجم عن الخطر أو التهديد المتصور ويحدث في أنواع معينة من الكائنات الحية، ويقوم بدوره بالتسبب في تغير في وظائف الأيضية والعضوية ويفضي في نهاية المطاف إلى تغيير في السلوك، مثل الهروب، الاختباء، أو التجمد تجاه الأحداث المؤلمة التي يتصورها الفرد. وقد يحدث الخوف في البشر ردا على تحفيز معين يحدث في الوقت الحاضر، أو تحسبا كتوقع وجود تهديد محتمل في المستقبل كوجود خطر على الجسم أو الحياة عموما .. وانا مقتنعة ان الخوف من حاجه هو اللي بيغير في طريقتنا في معالجة الامور، وبالتالي ممكن يكون سبب في اصابتنا بالحسد مهو اللي بيخاف من العفريت يطلع له مش كده ولا ايه؟
طب والحل؟
انا شايفة ان الحل بسيط، احنا لو بطلنا نخاف من الحسد مش هنتحسد، مهو اللي حضر العفريت، يصرفه؟!
التعليقات على الموضوع