#إعدادات_المصنع .. موف غامق؟!

خلال الخمس شهور اللي فاتوا أحوال الناس كلها كانت متشقلبة فوقاني تحتاني اشي خوف من الكورونا واشي ناس فقدت شغلها وعزيز فقدناه .. يعني ضغط من كل حته، كل واحد فينا بيتعامل مع الضغوط بطريقته في ناس بتعافر زي حلاتي كده وده اللي جايه اتكلم معاكم عنه النهارده وناس راضيه بالامر الواقع وعامله مش واخده بالها دول ملناش دعوة بيهم، نخش في الموضوع أنا من الشخصيات اللي طبيعة شغلها طابعه عليها بشكل كبير، تقريبا دمي بيجري فيه كرات دم بيضاء وحمراء وعلاقات عامة يعني كل أزمة أو موقف بمر بيه في حياتي بلاقي صوت عادل إمام بيرن في دماغي بس المره دي بيقول (هي العلاقات العامة قالت ايه؟) وبناء عليه اتعامل مع الموقف بدون نقاش .. طالما انا في ازمة يبقي لازم اتعامل معاها لحد ما اوصل لحل.

التعامل مع الأزمة ليه خطوات : 

• أولا .. نعترف أن في أزمة وهي ايه بالظبط.
• ثانيا .. نسأل نفسنا .. هي الأزمة دي حصلت ليه؟
• ثالثا .. نمسك كل سبب من دول ونشوف هنعرف نتعامل معاه إزاي؟
• رابعا .. نفهم اتعلمنا من الأزمة ايه؟

وده بالضبط هو اللي انا عملته خلال الفترة اللي فاتت، اولا .. أعترفت ان عندي مشكلة في إعدادات المصنع المسئولة عن العلاقات الإنسانية، وبعد ما عرفت المشكلة سألت نفسي بشكل واضح وصريح اللي بيحصل ده أسبابه ايه؟ مهو بيقولك "إذا عرف السبب بطل العجب" وده اللي هيساعدنا نحط خطة الحل وهي ما يطلق عليها في العلاقات العامة (إستراتيجية إدارة الأزمة) وبس يا سيدي خدت ديلي في سناني وبدأت رحلة البحث والفحص والتمحيص، واكتشفت اني مش فاهمه نفسي بالقدر الكافي وده اللي كل فتره يحطني في مواقف ملهاش اي 30 لازمة وتنتهي بأزمة تعكر صفو حياتي.

واحنا بنتعامل مع أسباب الأزمات مهم جدا الاستعانة بآراء المختصين، لان ده هو اللي ها يقصر علينا المشوار والعمر بيجري يا جماعة ضيعنا وقت كتير ان الأوان نركز شوية،  انا دورت كتير الحقيقه اتكلمت مع اصدقائي المقربين، وسألت أهل الخبره عشان الاقي إجابه للسؤال .. هو انا ليه بيحصل معايا كده؟

لحد لما اتكعبلت في قناة سحر النادي على يوتيوب، القناة صحيح بتتكلم عن الشخصية النرجسية لكن في قائمة عظيمة بعنوان "مهارات نفسية مهمة" انا بنصح اننا نسمعها كلنا الصراحة دا غير ان محتوى القناة هيساعدنا في التعامل مع الشخصيات النرجسية في حياتنا وهم بقو كتير اوي الصراحة من الاخر يعني محتوى القناه بشكل عام مفيد سواء في العلاقات او التعامل مع الشخصيات النرجسية او التعامل مع نفسك، من الحاجات الظريفة كان فيديو بعنوان " تحويل المعرفة إلى خبرة" وانا من وجهة نظري المتواضعة شايفه ان الفيديو ده مهم جدا لان الحقيقه كلنا عارفين حاجات كتير لكن وقت التطبيق نغرق في شبر ميه ومانعرفش نتصرف .. وده بشوفه مع ناس كتير لما بعمل كورسات علاقات عامة الناس طول فترة الشرح فاهمين ومركزين لكن اول ما تيجي تطلب حاجه عمليه بشوف العجب.

القائمة اللي بتكلم عنها دي ساعدتني شخصيا الاقي الإجابة علي هذا السؤال الوجودي اللي بيرن في وداني مع كل موقف بمر بيه، الإجابة يا ساده بإختصار "التنشئة الإجتماعية" يعني انت اتربيت إزاي؟ وعلي ايه؟ وهنا يظهر دور الأم بشكل واضح مهي يا هتربي انسان سوي يا إما إنسان غير سوي، وده هيأثر عليه في حياته وفي حياة كل اللي بيتعامل معاهم، يا ريت كل ام تفتكر ان 90% من قاموس الشتائم عندنا هو شتائم بالأم حاجة مؤلمة مش كده؟ الأم اللي كل الأديان كرمتها هي نفس الست اللي بتتشتم مع كل موقف ابنها او بنتها بيعملوه وهم بيتعاملو مع غيرهم .. فكل أم علشان خاطر ربنا اسمعي الفيديوهات دي وساعدي المجتمع أن يكون فيه بني ادم سوي الحياه صعبه و المشرحة مش ناقصة قتلى أرجوكي.

الخلاصة يا جماعة هي .. من وجهة نظري المتواضعة ان البني ادم هايكون في أحسن حالاته لو فهم نفسه الوحش قبل الحلو، لو فعلا نفسنا نعيش حياة لطيفة هادئة اعترف بمشاكلك وكلاكيعك النفسية وامسكهم كده كلكيعة كلكيعة واتصاحب عليها وفكها، احنا طول حياتنا كل تركيزنا علي إزاي أنجح في الدراسة وأبقى من الأوائل وبعدها ننجح في الشغل علشان نترقي ونكسب فلوس كتير ونفضل ندور في الدايره دي زي الجاموسة اللي بتدور في الساقية ، ولا عارفين احنا جايين الدنيا نعمل ايه ولا عايشين ليه ولا دورنا ايه؟ 

ببساطة كده احنا اتعلمنا نبقي شاطرين في كل حاجه إلا أننا نبقي شاطرين مع نفسنا أظن آن الأوان نغير اللى اتربينا عليه ونفهم أنفسنا ونحبها ونتصالح معها علشان نعرف نعيش .. مش كده ولا ايه؟!