السالسا وأشياء أخرى عبثية

بقالي 3 سنين بخطط اني اتعلم سالسا، وكل ما اخد القرار اكسل اتشغل المهم مفيش ولا مره اخدت الموضوع بجد برغم انها كانت امنيه من امنيات حياتي، لحد من شهرين .. وبس يا سيدي وقررت ونفذت وخدت الموضوع بجد بعد طول انتظار.

وخير اللهم اجعله خير لقيت السالسا موضع كبير اكتر منه رقص عشان نقضي وقت لطيف وخلصنا، دعوني ادلي بدلوي عن تلك الأشياء العبثية في تلك الرقصة العجيبة ..

اول درس في السالسا المدرب قالي " تعلم البنات السالسا اسهل من الرجال، لان البنت كل دورها هو أنها تتبع التوجيهات" (مجتمع ذكوري بطبعة حتى في الرقص) وفي جملة كده بسمعها كتير واحنا بنرقص "I lead you follow" وطبعا دي كانت أول مشكلة واجهتني انا متعودتش حضرتك امشي على خطوات حد انا "محدش يقولي اعمل ايه" وطبعا كنت طول الوقت يسبق بخطوة واتخيل اني عارفة الخطوة الجاية مع اني معرفش، من الاخر كده انت بتتعلم ازاى تسيطر على تصرفاتك واللي في اوقات كتير تتخيل انك مش هتقدر تغيرها فطالما عرفت تغيرها علشان تنبسط في السالسا يبقي ممكن تتغير في الحاجات التانية معروفة.

الحاجة الثانية اللي تعلمتها ان السالسا مش بس مهارة حركة، دي مهارات اتصال يا عزيزي والشاطر هو اللي يعرف يتواصل بشكل جيد مع اللي تشاركه الرقص، مش بس كده لو بنرقص (رويدا) ودي بتبقي حلقة رقص ونبدل مع بعض وبناء عليه فانت مش بتتواصل مع شخص واحد انت عارف اوله من اخره لا دا انت كل دقيقه بتروح تتواصل مع حد تاني خالص مع تجربتي انا كان مش بس شخص تاني معرفوش لا دا كمان جنسيات مختلفة فتخيل بأه وانت تحاول تتواصل مع أشخاص وثقافات مختلفة ولغات مختلفة وطول الوقت ده انت مطالب بالتواصل المضبوط علشان متبوظش الرقصة، يعني الخلاصة ان السالسا بتعلي مهارات الاتصال عند معاليك وانت وشطارتك بقى.

اخر حاجه يحضرني فيها قول صديقي الفيلسوف لما قال .. "حتى الرقص فيه بعد وقرب يا رشا" ووهذا درس لو تعلمون عظيم في العلاقات، لان في السالسا انت بتقرب وتبعد واحيانا تلف وترجع تاني واحيانا تدي ظهرك للماضي وتكمل بكل ثقة و متبصش وراك مش قلتلك علاقات، وفيها انت لازم تفهم اللي بيشاركك الرقص عشان تعرف تكمل و بتحتاج وقت وتدريب وبتغلط وتتعلم من اخطائك لحد ما في وقت من الأوقات نقدر نقول انك كده خلاص زي الفل، العلاقات كده برضه فيها بعد وقرب وتفاهم وكل ما اديت نفسك وقت في فهمها كل ما كانت علاقاتك ماشية في الاتجاه الصحيح، ولو العلاقة دي انتهت لأي سبب من الأسباب فأنت مطالب انك تكمل ومينفعش تبص وراك.

وهذا عزيزي القاريء اللي اتعلمته من السالسا لحد دلوقت .. لو اتعلمت حاجه جديدة اكيد هقولكم عليها ما انتو عارفين اللي في قلبي علي مدونتي.