تعامل جيدا مع معارض التوظيف

كايرودار 
الثلاثاء 04-06-2013 00:25

من كم سنة بدأت تنتشر فكرة أن الشركات تتجمع كلهم فى مكان واحد يطلق عليه مهرجان توظيف أو معرض التوظيف أو نسميه Employment Fair…. غالبا المهرجانات يتم تنفيذها بواسطة الجامعات أو الجامعات الخاصة أو غرف التجارة ويتم الإعلان عنها فى الجرائد ومن خلال مواقع تلك الجهات.

دعونا نتحدث عن أهمية تلك المعارض…

الحقيقة هى مفيدة لأكتر من فئة…مثل حديثى التخرج والباحثين عن عمل ومن يرغب فى تغيير مجاله….الخ، هنتكلم عن كيفية استفادة من تلك المعارض .

أولا : حديثى التخرج:

تلك المعارض بـ تساعدهم على حاجتين مهمين جدا:

أول حاجة…. إنهم من خلالها بـ يتعرفوا على احتياجات السوق ؟؟؟وطلبات الشركات؟؟؟؟ وطبعا بذلك يطور من مهاراته وفقا لاحتياجات السوق.

ثانى حاجة….إنهم يكون عندهم فرصة وضع السيرة الذاتية فى أكثر من مكان، كما يتعرفوا على شركات كثيرة ومراكز التدريب وأيضا تحد من رهبة البحث عن عمل .

ثانيا : من يرغب فى أن يغير مجال عمله

أيضا يحظى بفرصه تقديم السيرة الذاتية أكتر من شركة…ويتعرف على الشركات، خاصة أن غالبا ما يكون مسئول الموارد البشرية والتوظيف موجود، فطبعا فرصة جيدة لبناء علاقات عامة مع تلك الشركات.

ثالثا : فئة من يعمل بالفعل

غالبا فى ناس كتير بـ تشتغل…وعاجبها شغلها…ومش عايزة تغيره، طيب ما يروحش يعنى ولا إيه ؟؟؟ لا الحقيقة هو هيروح…بس هيروح علشان يتعرف على الشركات الأخرى، والتى تعمل فى نفس مجاله كما يتعرف على الجديد فى السوق…ممكن يطلع بفكره يطور بها شغله هو شخصيا أو يتعرف على ناس جديدة يعنى الهدف هـ يبقى علاقات عامة وتطوير، دا غير أنه ممكن يتعرف على احتياجات الشركات إيه …يعنى لو يعمل فى المبيعات مثلا ممكن يفتح لنفسه أسواق جديدة …ولو يمارس التدريب ممكن يقدم لهم خدمات تدريبية …أو على الأقل يتعرف على طلبات السوق ؟؟؟

ولكن يأتى السؤال .. كيف أتعرف على مواعيد تلك المعارض

1- متابعة الجرائد والمجلات اللى بتهتم بالتوظيف.

2- متابعة الانترنت والبحث كل مدة عن أخبار معارض التوظيف.

3- الجامعات..الجمعيات الأهلية والنوادى والجامعات الخاصة …كل دول بـ يعملوا معارض توظيف.

4- متابعة كل الأماكن اللى فيها قاعات…قاعة المؤتمرات ..دار الأوبرا …الخ.

أما بالنسبة للخطوات التى اتبعها للذهاب … علينا فعل التالى:

1- كتابة سيرة ذاتية جيدة.

2- طباعة نسخ كثيرة من السيرة الذاتية الخاصة بنا .

3- تسجيل بياناتى قبل الدخول حتى يتم إعلامى دائما بمواعيد تلك المعارض.

4- المرور على كل الشركات للتعرف على الشركات المشاركة .

5- مقابله مسئولى كل شركة فى مكانها السؤال عن الفرص المتاحة وتقديم نسخو من السيرة الذاتية الخاصة بى.

6- بعد المعرض …أقوم بإرسال خطابات شكر لكل من تعرفت عليهم خلال المعرض وهذا من شأنه أنه يذكرهم بى .

الحقيقة…دى حاجة من الحاجات اللى الواحد بـ يعملها علشان يقدر يوصل لما يحلم به .