كل يوم مهارة .... التفكير الابداعي

تدويناتي 

27 يوليو 2012

من وجهة نظري الإبداع موضوع مش من الصعب اكتسابه .... والابداع من العوامل الهامة جدا في التطور الوظيفي لان الشخصير المبتكره غالبا ما بيكون بالبلدي كده نجمها طالع وبيتم الاعتماد عليها ...

من وجهة نظري الشخصية المبدعة هي الشخصية القادرة علي التفكير برا الصندوق "out of the box " والحقيقة الاسلام حسنا علي التفكير ودا من خلال كلمات مفتاحية متمثلة في (يعقلون في 22 آية، تعقلون في 24 آية، الألباب في 16 آية، الأبصار في 9 آيات) كما أشار إلى الفكر والتفكير تحت كلمات مثل (يتفكرون في 10 آيات، تتفكرون في 3 آيات) وفي هذا دليل واضح على الاهتمام بالعقل و التفكير بشكل عام.

الابداع مش مرتبط بمجال او تخصص معين دا حتي في حياتنا الابداع مطلوب وهو غير مرتبط بمستوي تعليمي او علمي فكم من المبدعين لم يكملوا دراستهم ... زي العقاد مثلا ..

كام واحد فينا صحي كده من النوم الصبح وسال نفسها .... هل انا مبدع ؟؟؟؟

علي فكره الاجابه علي السؤال دا تتوقف علي رغبتك انت في الابداع ... فكلنا عندنا مهارات وقدرات ابداعية لكن قليل منا من يستغل القدرات والمهارات دي بشكل فعال ... و بيسعوا دائما لتطوير نفسهم و بيشتغلوا علي نفسهم كتير ...

طيب مين هو المبدع ؟؟؟

المبدع بيكون ليه صفات خاصة ....

1-      دايما بيفكر برا الصندوق ...

2-      لا يكتفي بطريق واحده للحل ....يعني دايما عنده خطه بديله.

3-      يبحث عن الحلول البديلة والغير تقليدية.

4-      عنده تصميم واراده قوية ...

5-      عنده اهداف واضحة ومحددة وصريحة.

6-      دايما بيبص لنص الكوب المليان ... وبالنسبة للتعليقات السلبية الي غالبا بتكون من اعداء النجاح بتدخل من اليمين وتخرج من الشمال في ثانية.

7-      و مش بيخاف من الفشل بالنسبه له الفشل هو اول خطوات النجاح.

8-      يكره الروتين .

كمان الشخصية المبدعة بتتسم ببعض المهارات منها مثلا ...

1-      سرعة الإحساس بالمشكله ... من وجهة نظري المبدع رافع شعار " خلقت المشاكل لنعمل علي حلها .. واذا اخطانا فعلينا ان نتعلم من اخطائنا " .

2-      المرونة ... الشخص المبدع شخصية مرنه مش معقده ابدا

طيب اي هي الفكره الابداعية .؟؟؟؟

الفكره الابداعية ليها عوامل منها

1-      فكره تجذب الانتباه ؟

2-      الفكره لازم تكون قابله للتطبيق.

3-      الفكره يجب الا تتعارض مع القيم والقواعد المتبعة

الابداع ليه معوقات المفروض علينا اننا نتجنبها وناخد بالنا منها ...

1-      الشعور بالنقص ... فيه مقوله انا مش عارفه مين الي قالها الحقيقه لكن دايما بحطها قدامي " انما يراك الناس بقدر ما تري نفسك " فاياك والشعور بالنقص كل واحد فينا اكيد فيه حاجه تميزه عن الاخرين بس هو الي مش واخد باله منها .

2-      عدم الثقه بالنفس.

3-      عدم التعلم ... دا موضوع مهم جدا اول كلمة نزلت في القران كانت أقرا ... ودا دليل علي اهمية العلم والقرائة والاطلاع المشكله يا جماعة ان التطور اصبح سريع جدا ف بالله عليكم تاخدو بالكم من هذا الموضوع وتتعلموا.

4-      الخوف من تعليقات الأخرين السلبية .... اوعي وتكسير المقاديف ... اي راي سلبي اعمل نفسك مش واخد بالك.

5-      الخوف علي الرزق ... الموضوع دا في ايد ربنا سئل الحسن البصرى عن سر زهده فى الدنيا فقال أربعة أشياء: علمت أن رزقى لا يأخذه غيرى فاطمأن قلبى، وعلمت أن عملى لا يقوم به غيرى فاشتغلت به وحدى، وعلمت أن الله مطلع علي فاستحييت أن يرانى عاصيا، وعلمت أن الموت ينتظرنى فأعددت الزاد للقاء ربى  يعني من الاخر توكل علي الله والي في نصيبك هيصيبك

6-      الخوف من الرؤساء .... دا طبعا بيحصل كتير جدا ان الواحد يقون خايف من مديره لكن انا بقول يكفيك شرف المحاولة متخافش .

7-      التشاؤم .... لسه من ويه قايله ان المبدع دائما بيبص لنص الكوب المليان .. افتكروا كده كويس.

علي فكره فيه طرق ممكن تخلي من الانسان اكثر ابداع ...

•ناقش شخصاً آخر حول فكرة تستحسنها قبل أن تجربها 

•تخيل نفسك رئيس لمجلس إدارة لمدة يوم واحد ... تفتكر ممكن تعمل ايه ؟؟؟؟

•استخدم الرسومات والأشكال التوضيحية بدل الكتابة في عرض المعلومات الرسم بيكون اكثر جاذبيه من الكلام..

•قبل أن تقرر أي شيء، قم بإعداد الخيارات المتاحة.

•جرب واختبر الأشياء وشجع على التجربة.

•اعتمد علي نفسك .

•ارفع شعار افعال وليس الكلام

•أكثر من السؤال.

•قل لا أعرف مهو مش معني انك مبدع تبقي عالم بكل شيء ... من قال لا اعرف فقد افتي

•إذا كنت لا تعمل شيء، ففكر بعمل شيء إبداعي تملئ به وقت فراغك.

•ألعب لعبة ماذا لو ..؟

•انتبه إلى الأفكار الصغيرة.

•تعلم والعب ألعاب الذكاء والتفكير.

•خصص دفتر لكتابة الأفكار ودون فيه الأفكار الإبداعية مهما كانت هذه الأفكار صغيرة "ثقافة الكشكول ".

يلا يا جماعة عايزين نبدع باه ... مستنينن ايه؟؟؟؟؟؟؟؟؟؟؟