الحدق يفهم

تدويناتي



طيب نبتدي منين ...نبتدي منين؟؟؟؟؟
بس لقيتها ....فاكرين لما كتبت و ايه يعني 35...حكاية ميرو الي عدت ال 35 و متجوزتش ..و قضت حياتها شغل و حركات و نسيت الارتباط و الكلام اللطيف دا ....وقلتلكو ساعتها ايه؟؟؟
اكيد نسيتو ....يلا و مالو مهو في الاعادة افادة ...بقي البنت يا اما الناس تتحزن عليها علشان يا عيني لسه مجالهاش العدل ...أو شاب لطيف يقضيها حركات (طبعا فاهمين عايزه اقول ايه؟؟) و يقول عليها اصلها بنت سهله مينفعش ارتبط بيها ...يا اما شاب ظريف فرحان بنفسه فاكر ياما هنا ياما هناك و روح في قاعدة تعارف يقلب البضاعة و يا يشيل ...يا عادي باه معجبتوش ...بتحصل.
ايه باه النهارده ....النهارده عايزه اعرف انتو عايزين ايه....شيزوفرينيا ...شيزوفرينيا ...شيزوفرينيا ...
تعبت بجد من اصحابي الولاد منهم الي يدي دروس في ازاي البنت تتعامل مع ولد ....لا و يحط حدود...متتنازليش معاه علشان يجري وراكي ...خدي بالك ...و يجي باه هو هو نفس الانسان بلحمه و شحمة وبابا غنوجه و سلطاته ..تلاقيه حاجه تانيه ؟؟؟؟
تعد معاه باه ...هو انت مش قلت البنت المفروض انها تبقي عامله ازاي و تحافظ ازاي و حركات ؟؟؟؟ أه قلت ...طب ايه؟؟؟ مهو الي يقول يعمل ...و لا ايه؟؟؟؟ لا اصل احنا بشر ...يعني لو شوفتي واحد دلوقت بيبوس واحده ..و تساليه ؟؟ترضي كده علي اختك ؟؟ طبعا هيقول لا ...بس بيبوس صحبته عادي يعني... بتحصل اصل احنا بشر
غير باه نوع تاني مقسمهم مجموعات ...مجموعة المرح ...مجموعة المصالح ...مجموعة القاعدة الحلوة ....حتي مجموعة الي بالي بالك
و الي يقول لا ...الحقيقه انا ماجل مرحلة الارتباط الرسمي لحد ما استقر ...لكن ميمنعش اننا محتاجين حاجه نطري بيها القاعده ..و لو فيه نصيب ان شاء الله مكملين ..و طبعا ميمنعش من شوية الحاجات الصغيره الي كلنا عارفينها ...طبعا باسم انا بحبك .
و علي راي الراجل الي انا معرفش هو مين لم قال ...كم من الجرائم ترتكب باسمك ايها الحب...
نهاد رجب كتب توبيك جامد اوي اسمه ...اسرار الولاد 1 و اسرار الولاد 2 .....بجد هايل اخر حاجه ...انا بطلب من كل بنت انها تقراهم ..وأكتر حاجه بطلب كل بنت و كل ولد ينفذها ...انهم يتقو ربنا في بعض ....
يا جماعة الحكاية مش حكاية نرتبط بمين ....الحكاية حكاية نرتبط ازاي ...انا مش رافضه الحب ...بالعكس خالص ....لكن رافضة الطريقه الي بنعرف بيها الحب.... مبحبش نظام ماسك العصاية من النص...يا بحب ..يا مبحبش ...مش اصلي معجب بيها ..اصل نجرب بعض ...و في الاخر يسيبها ..و الي يتبهدل في النص البنت ...تسيب دا و تروح لدا ...و البنت بقي تخرج من تجربه و عايزه تنسي ...تدخل في تجربة تانيه ...و ثالثله ...هلك مشاعر ..كل واحد عمال يستنفذ من مشاعره ..و بعد كده تتجوز اي جوازه و السلام ..و هو يتجوز واحده ميعرفش عنها حاجه تنقية الحاجه ......الكارثة انها بعد ما تتجوز مبتلاقيش مشاعر تديها ....و لا هو كمان ....و بعد شويه يزهق و يبقي عايز يدور......مهي خلصت مع فلان و علان ...فالمشاكل تزيد ...و طلاق و بهدلة...طب ليه مهو بادينا من الاول.
البنت مش صورة متدلعة علي بروفايل الفيس بوك ....
البنت مش الي لابسة اسدال و حافظة القران ...و ماسيه ماسكه ايد واحد ..و لا نايمه علي كتفه تخت شجره...
البنت مش الي تليفونها مع كل من هب و دب ...
البنت مش الي ضحكتها في الشارع تلعلع...
البنت مش الي لابسة ضيق ولا قصير....
يا بنات ....ارجوكم حافظو علي نفسكم .
يا بنات ....أرجوكم اتقو ربنا في نفسكم ....و احترمو اللبس الي انتو لابسينه ...
الي حافظه منكم القران ...أرجوكي أعملي بالي حافظاه ...
و الي لابسه اسدال ارجوكي احترمية...
يا بنات ...ارجوكم متدوش فرصة لحد يدوس عليكم .
يا بنات ....لو انتو ركزتو علي نفسكم و مستقبلكم ...الولد هيجي هيجي ....
افرحي و العبي و اعملي الي انتي عايزاه ...انتي حره ...بس من غير متقللي من نفسك ......
الولاد ليهم حق علي فكره ....انتو الي بتعملوا كده في نفسكم ...الولاد مش ذئاب بشرية...انتو الي بتدولهم الفرصة....
و علي فكره لو ملقيوش فرصه ....مش هيبقي قدامهم غير انهم يتجوزو ...منتو عارفين ...ميقدروش يعيشو من غيرنا ...
رشا خليفة

ليست هناك تعليقات