الجمعة
وذهبت أمينة .. وكنت أحسبها لا تذهب؟!



في وسط الكلام بعد السلامات والسؤال عن الأخبار .. فاجأني بالسؤال هي امينة راحت فين؟!

ابتسمت ابتسامه هبله اداري بيها توتري من السؤال .. وقلت موجوده هتروح فين يعني، أهي قاعدة

قالي لا .. وديتي أمينة فين؟! فين أمينة اللي قابلتها اول مره في ابو ظبي من سنين .. ودتيها فين؟

صدمة السؤال .. خلتني فعلا مش عارفة ارد، وفي عقلي بدون شعور بدأت أكلم نفسي هي بجد امينة راحت؟ ساعتها انا كنت برد لكن في الخلفية مليون سؤال بيتخانقو مع بعض .. لكن علشان اعرف اكمل المكالمة ابتديت أسأل واجادل بأي كلام ..

خلصت المكالمة والسؤال بيرن في وداني وديتي أمينة فين؟

خلوني احكيلكم مين أمينة .. أمينة هي بنت مصرية جدعة بجد مفيش حد ممكن يقصدها في خدمة غير لما بسرعة وبدون مقدمات تنفذها حتي لو مطلبش الخدمة فهي بتتبرع وتعرض خدماتها عالصغير والكبير واللي دايما بتكون بدون مقابل .. أمينة بنت ناس متربية لما وصلت 35 سنة قررت انها مش عايزة حاجه من الدنيا شغل واشتغلت في احسن اماكن تعليم واتعلمت ماجستير وعملت كورسات واخدت غرام وانتقام وحبت وجرحت وانجرحت .. جربت كل حاجه في الحياة فكل اللي كانت عايزاه من الدنيا هو انها تعيش في هدوء وتلاقي حد يونسها في حياتها الحد دا مش لازم يكون حبيب ولا زوج ممكن يكون صديق/ة حد يكون عندهم إهتمامات مشتركة فيسلو بعض ..الخ

أمينة هي من يطلق عليها (القوية بضعفها) يعني هي فعلا غلبانا لكن الصورة الذهنية اللي بتديها للناس غير كده فكل اللي يقابلها بيحس انها قوية دا غير انها ليها هيبه كده لما بتقعد في اي مكان بتعرف ازاي تسيب انطباع جيد عند كل الناس الموجودين .. وبتداري دايما ضعفها بصوتها العالي واحيانا نقدها للمواقف وغالبا هي بيكون عندها حق ...

أمينة بأه راحت فين؟

أمينة زي ما قلت انها كل أملها تعيش حياتها في هدوء لكن هي بطبعها بني ادمة شقية فحتي الهدوء في حياتها دوشة بطريقة ما .. المهم ان امينة من 2011 وهي مش شايلة هم حاجه بتسافر وتخرج وتسلي وقتها في شوية شغل وكان كل هدفها في الحياه الإهتمام بأمينة وحب أمينة ورعاية أمينة .. وكان كل شيء ماشي زي الفل.

لحد ما دخل حياتها متغيرات جديدة فرضت عليها حجات مكانتش متوقعه

أمينة دلوقت مبقتش زي زمان ... أمينة كل يوم اصبح عندها مشكلة جديدة محتاجه لحل

يوم اهم اثنين موظفين سابو الشغل .. علشان اسباب شخصية

يوم قررت تتجوز ومن بعدها كل يوم مشاكل مع جوزها اللي بيزعل ويتقمص من اقل تصرف

يوم بتحاول تحافظ علي العملاء

يوم بتحاول تحل مشاكل جوزها في شغله

يوم بتحل مشاكل شغلها

جوزها مقموص وهي بتحاول تحل المشكلة

مشاكل مع الموظفين

جوزها مقموص تاني

مشكل مع العملاء

يوم جوزها بدون اي مقدمات ساب كل حاجه واختفي (دا بجد اختفي)

كلمت جوزها .. قفل السكة في وشها

يوم شريكتها تقرر تمشي علشان اعصابها تعبت .

راحت لجوزها .. مرضيش يقابلها

يوم بتدور علي موظفين جداد ...

جوزها كلمها علشان يقابلها .. قابلته طلب فلوس (إبتزاز يعني) وقالها رايح الحمام وسابها ومشي ..

نعيد الشغل من الأول

مشاكل مع العملاء

الموظفين مقموصين

ماما تعبانة ...

موظفين مقموصين تاني ..

انا تعبانة ...

محتاجين فلوس نحل بيها المشاكل

مش هتكلم بأه عن الليالي اللي قضيتها تعيط .. ولا الأيام اللي مكانتش عارفة تشتغل ولا لما كانت بتقعد عالأرض بالساعات تعيط علي حالها .. ولا كل اللي حواليها اللي تفننو في ازي يطلعوها غلطانة ولا محاولاتها في تصليح اللي فات واللي مبيتصلحش .. ولا كل تصرف عملته بنية طيبة واتاخد العكس ولا كل كلمة بتقولها وكل واحد يفهمها علي مزاجه ..

مبدأيا أمينة مش مظلومة ولا مكسورة الجناح هي اختارت إختيارات غلط ومتحملة مسئولية ونتيجة الغلط دا كاملا ومدركة كويس جدا ان كل الدراما اللي حصلت طوال 3 شهور ما هي إلا سمكة القرش اللي جاية تحرك الميه الراكده... فهي قررت تستخبي جواها وتطلع نسخة تانية تقدر تتعامل مع كل الظروف دي تقدرو تقولو من كثرة الفترة اللي قضيتها في قاع البلاعة البشرية اتوسخت حبتين .. لكن الأصل غلاب هي بس مطلعة شوية حيل دفاعية علشان تفضل واقفة علي رجليها.

امينة لا تذهب يا عزيزي فأمينة هي الأصل ... ولكن بعض الفترات تحتاج منا بعضا من القوة مع كثير وكثير وكثير من قسوة القلب لكن قسوة قلب متغطية محبة زي قسوة الأمهات علي عيالهم كده 😄😄😄😄😄😃😃😃😃😃
الأحد
وكانت رأس السنة ..


غالبا انا من الناس اللي معندهاش اي طقوس للإحتفال بأي أعياد، الأعياد بالنسبة ليا يوم عادي زي اي يوم، في مناسبات بتعدي مرور الكرام، ومناسبات بتعدي لعلها ذكري للذاكرين :)

امبارح أخر ايام ال 2016، بالصدفة كنت بوصل إحدي صديقاتي بعد يوم شغل طويل بزيادة ومشاكل ما انزل الله بها من سلطان مش دا موضوعنا المهم يعني بدل ما اوصلها لأقرب محطة مترو وصلتها ابعد شوية واهو الواحد يتمشي بالعربية، طبعا شوارع القاهرة كانت مثال حي لأغنية عدوية زحمة يا دنيا يا زحمة، تخلل ذلك رغي وكلام ..

كالعادة مفيش فرصة غير لما تيجي سيرتك .. ورديت وانا عقلي عمال يقولي انا زهقت من التفكير والكلام في الموضوع  وتخلل الحوار تبجيل وتفخيم في مدي أهمية كوبري اكتوبر اللي احنا مخدناهوش :) بصيت عالكوبري وافتكرت رحلات الغردقة وأسوان والوادي الجديد ورحلات المطار الساعة 4 الصبح وقد ايه كانت بالنسبة ليا متعة اني اتفرج علي كوبري اكتوبر الفجر واتخير اني في امريكا :) ولما كنت بقولكم كده كنتو بتضحكو عليا افتكرت قدي ايه وحشتوني وفرقنا السفر وكل واحد فينا بقي في بلد.

بعدها عديت من نفس طريق الدراسة، من أول سنة أولي لحد الماجستير، وأفتكرت زمايلي والمذاكرة وسنتر الدروس اللي كنت فاتحاه في بيتي وماما وشلة ال18 بني ادمي اللي ماما كانت متولياهم فطار وغدا ومشاريب ..

وعديت من تحت بيتك وافتكرت أول معكرونة بشاميل كانت عمايل ايدي ومعاها فراخ بانية وخضار سوتية، كل حاجه في مكانها مفيش اي شيء اتغير اللي اتغير هو ان الناس مش نفس الناس.

عديت عند نادي السكة وافتكرت مغامرة السويس، افتكرتك بصيت في العربية ادور علي ال CD ملقيتهاش، فتحت البرنامج الأوربي تصدق كل التراكات اتلعبو ورا بعض تخيل؟ بصيت الناحية الثانية افتكرت رحلة دهب وبصيت لجانبي الطريق في دماغي ولقيت ان نفس المكان يحمل اكثر من ذكري.

وفي المعادي افتكرت هذا الكم من المغامرات علي طريق الأوتوستراد، ولما وصلت بيتي بشكل لا إرادي بصيت علي شمالي وضربت كلاكس ذنبك ايه ذنبك بحبك ( عادات فرعونية قديمة)

ووصلت البيت وأنا بغني اغنية ليلي غفران وسط اوراقي القديمة .. ودمعة نزلت من عنيا قلت لو تملك إيدايا كنت ارجع بالسنين وسكت ولقيتني بقول كنت هعمل نفس اللي عملته  .. اللي فيه داء يا أخوانا مينساهوش وعلي رأي صديقي الصدوق (هو انت من امتي كنتي بتعملي حاجه زي باقي الناس .. ما إنت طول عمرك الناس تقول تقول شمال وانت تمشي يمين)

انتهي اليوم بالفرجة علي حوار مايا دياب مع عمرو اديب ..
وكأنها رسائل بعد هذا الكم من الذكريات ..

  1. حبي نفسك كده زي ما هي.
  2. اعملي اللي بتحبيه ومتسمحيش لحد ينتقدك فيغير طريقتك.
  3. كوني الشكل اللي انت عايزاه.
  4. ربنا بيدينا الجمال والأخلاق والعقل .. وعلينا صيانتهم.
  5. متشغليش بالك برأي حد فيكي .. محدش بيعجبه حاجه.
ونمت بأه علشان اصحي بدري اروح الشغل اجري علي اكل بيتي فوري :)
الجمعة
خناقشات  2015 و 2016 ..؟!


من العادات الفرعونية القديمة ان كل سنة أكتب تدوينة اخر السنة اللي بيكون فيها خلاصة السنة بحالها، 2015 و 2016 حققت فيهم كل اللي انا عايزاه واللي يعرفني من زمان اكيد عارف عني اني مبحطش حاجه في دماغي غير لما لازم وحتما ولا بد اني اوصل لها ولو بعد حين .. 

المواقف اللي عديت بيها في السنتين دول سواء علي المستوي المهني أو المستوي الإنساني، كلها مواقف عادية زي اللي بتحصل لينا كلنا يتخللها الكثير والكثير من الدراما الناتجة من ناس تفتكرهم كويسين وبعدين يطلعو ولاد $$#$$$# وناس فعلا كويسين ووجهة نظرك فيهم متتغيرش، وناس تتعلم منهم، وناس تقرر تخرجهم من حياتك (بس بشياكة) وهلم جرجر.

علي المستوي الإنساني والعاطفي .. فعلي رأي المثل .. قابلت زيد وعبيد ونطاط الحيط، في 2015 كانت تجربتي مش ناجحة اوي ودا كان بسبب اني اخترت الشخص اللي مش هيقدر يديني اللي انا فعلا محتاجاه، ونهيت العلاقة بشياكة واناقة وهدووووووء.
كنت مقررة اني اتجوز في 2016، وقد كان يا سادة لكن برضو التجربة لم تكلل بالنجاح، وعلشان الصراحة والأمانة الخطأ كان من كلا الطرفين، وبالرغم انها لم تنتهي بالشياكة اللي انا بحب انهي بيها اي علاقة إلا انها إنتهت .. كل شيء نصيب.
حتي الأصحاب والناس اللي اشتغلت معاهم وحصل بينا خلافات .. برضو كانت مسئولية الطرفين الواحد يقول اللي ليه واللي عليه.

وكانت الخلاصة كالتالي ... 
  1. انت المسئولة الوحيدة .. في كل علاقاتك انت السبب واجهي نفسك واتعلمي من اخطائك لكن متعلقيش شماعة الخطأ علش حد، المثل بيقول مفيش دخان منغير نار ومفيش حد بيطلع الوحش اللي جواه غير لما بيقابل العفريت اللي جواكي.
  2. من حقك تختاري اللي يعجبك .. دا مش حكر علي الرجاله، انا شايفة اننا شاطرين وواعيين وقد المسئولية .
  3. افصلي بين نجاحك العملي وبين شخصيتك المتواضعة جدا :) 
  4. حلم ان شركتك تبقي زي جوجل دا حلم من الصعب تحقيقه (الموظفين في مصر مش كده).
  5. اللي اصغر منك .. عمره ما هيفهم طريقتك الموضوع اعلي من مستوي تفكيرهم والناس كلها مش زيك لما كنت في سنهم الموضوع غير كده خالص تذكرو انت تعاملو الناس علي قدر عقولهم.
  6. البني ادم اللي بيفهم كلامك بطريقته وعلي مزاجة .. متحاوليش تبرري موقفك قدامه (سيبيه لأوهامه والزمن كفيل به)
  7. لو حصل وارتبطي .. وجه عرفك علي واحده وقالك انها صديقته الصدوقة اوعي تلجأي ليها لما تتخانقو علشان هي اول واحده هتكون سبب في فشل العلاقة (الستات متتوصاش في الحجات دي .. وخاصة بأه لو كانت من مستوي اجتماعي شعبي شويتين يا دين امي هتسمعي حجات اعلي من مستوي تفكيرك).
  8. لما واحد يدخل بيتكم وأهلك يقولو لا .. اعرفي كويس اوي ان العلاقة دي مش حقيقية احنا بس اللي احيانا بنضحك علي نفسنا علشان نفسنا نفرح ونفضل نجادل ونزوق في العلاقة علشان تكمل، بس مع الأسف الفرحة مبتدومش واحنا في مجتمع ذكوري سخيف انت فيه ملكيش اي لازمة في الحياه وقت ما هيجيله مذاجه هيمشي ولا هيفرق معاه.
  9. اوعي ترتبطي بواحد معندوش حاجه يخسرها ... 
  10. متجيش علي نفسك علشان حد.
  11.  كل الرجال المصريين عندهم نفس العقلية الشرقية زي بعض إلا من رحم ربي.
  12. بجد مفيش اي تجديد في الأداء خالص (اول العلاقة حب واهتمام ويا سلام - اخر العلاقة عقد نفسية وكلاكيع مجتمعية).
  13. المستوي الإجتماعي بيفرق جدا في العلاقات ومهم اوي جدا خالص محدش يرتبط بحد اقل او أعلي منه في المستوي الإجتماعي.
  14. فرق السن عامل اساسي في نجاح او فشل أي علاقة (اللي اكبر مني مكنش في نفس شقاوتي - واللي اصغر مني مكنش ففاهم عقلي).
  15. الأفلام العربي بتاعت ان واحد يرتبط بواحدة اكبر منه لأسباب في نفسه وهو بس اللي عارفها (حقيقة مؤلمة).
  16. اياكم والإرتباط بواحد متجوز .. النهاية بتكون سخيفة جدا ومها قالك من مبررات ان مراته منكده عليه في الأخر هيعمل ليها هي حساب والجديدة دي كأنها ولا حاجه (معلومة انا يمكن الوحيدة اللي معنديش اي مشاكل مع تعدد الزوجات لكن التجربة بتقول ان مفيش حد عنده الشجاعة الكافية لتنفيذ دا بشكل صح).
  17. قاعدة الخزانة يا بنتي ولا جوازة الندامة ... دي حكمة عظيمة لأن حضرتك وانت لوحدك عندك كل الحرية انك تعملي اللي انت عايزاه وقت ما انت عايزاه لكن مع وجود شريك في حياتك الموضوع صعب اوي صدقيني.
  18. الفلوس في العلاقات تفسدها .. خدي بالك.
  19. الأبيض والأسود لما بتحطو جنب بعض .. بيعملو مشاكل إياكي ترتبطي بواحد اقل منك نجاح فيغير من نجاحك ويطلع سلسفيل اللي جابوكي ويهد فيكي وينتقدك عمال علي بطال علشان يحسسك انك ولا حاجه جنبه ولا ترتبطي بواحد انجح منك فإنتي اللي تعكنني عليه لحد ما يفشل:) خدي اللي زيك.
  20. الحب دا كلمة لها معاني كتير اوي .. لحد دلوقت انا مفتكرش اني قابلت اللي فاهم معناها الحقيقه ولا استثني منك نفسي حتي انا يمكن مش عارفة معناها الحقيقه.
  21. كلام الناس .. لا بيقدم ولا يأخر وكل واحد بيدلي بدلوة بطريقته وبناء علي خبرته هو وتربيته واخلاقة وحجات كتير فمتسمعيش لحد.
  22. الراجل السند اللي هيقف حنبك ويدعمك وكده .. لسه متخلقش.
  23. العلاقات مش المفروض يكون وراها فايده .. فلو قابلتي اللي شايف ان علاقتكم لازم يكون في من وراها فوايد اخلعي بسرعة قبل ما هو يلم حجاته ويمشي بدون اي مقدمات علشان مفيش فايدة منك.
  24. يمكن كلام الست كان صحيح (قول للزمان ارجع يا زمان)  .. متحاوليش تصلحي اللي اتكسر مفيش حاجه تستاهل واعملي زي ما بيقولو حافظي علي كرامتك (مع ان مش فاهمه ايه علاقة الكرامة في الموضوع) بس هو عموما جهد مش هيجيب همه ومش هيحصل حاجه غير انك هتحزني اكثر وتزعلي اكثر.
  25. افصلي بين الشغل والحياة الشخصية .. ضروري علشان ترتاحي.
اما علي مستوي الشغل ...
فأنا الحقيقه شايفة اني بحقق أهدافي اللي انا راسماها صحيح وقعت 4 شهور السنه دي لكن بالرغم من كده فأنا في وقت قصير خدمت 12 عميل، واكيد ربنا زي ما رزقني قبل كده هيرزقني تاني وسبارك هتكبر وتبقي عروسة :).

في 2017 .. 
ناوية ارجع الف الصعيد تاني وأركز حبتين في العمل الإجتماعي، اما سبارك انا مش هقولكم خليها مفاجأة :) رجعت لإلغاء فكرة الجواز (ودا لأني منفعش اكثر من صديقة .. وبكون صديقة جدعة بشكل مرعب اما غير كده معنديش ذكاء عاطفي).


الأحد