خناقشة ...ياباني !!!!!!

خناقشات موزة و نوفا

لو فاكرين نوفا كانت بتشتغل ايه؟؟؟؟؟

نوفا كانت بتشتغل خدمة عملاء في كول سنتر ...و بتاخد كورسات كمبيوتر و انجليزي ....

المهم نوفا كانت دايما بتابع مع شركات التوظيف علشان تخرج من جو... الكول سنتر الي يرفع الضغط ...

في يوم ...شركة من الشركات اتصلت بيها ...و قالت ان فيه وظيفة سكرتيره في شركة كبيره ...كل الشروط انها تعرف كمبيوتر و تتحدث الأنجليزية بطلاقة ....

نوفا قالت تجرب حظها ...و علشان هي لبقه ...و تبيع الميه في حارة السقايين ...اقنعتهم بيها ...و الشركة عينتها في 

وظيفة سكرتيرة تنفيذية .... و ما أدراك ما السكرتيرة التنفيذية ....

نوفا راحت الشغل الصبح و مفيش اي مشكله ... طبعا هي بشوشه و لبقه واتعرفت علي الشركة كلها من اول يوم ..بس الباقة و الشياكه مش كل حاجه......

في يوم موزا و هو راجع من بره ....دا بعد ما اقتنع اخيرا ان قاعده القهوة و لعب الاستميشن مبيألكش عيش ...و انه لازم يجي علي نفسة و يتعب شويه صغيرين ...و يحسن مهاراته ...فأخد كورسات يحسن فيها طريقة نطق الأنجليزي.... دا غير انه قفل الشات و اليوتيوب ...و بقي استاذ في الكمبيوتر... المهم قابل نوفا قاعده علي باب العماره .........وهاتك يا عياط !!!!!!

مالك يا بنتي ايه الي حصل؟؟؟؟ ....قالتله طردوني من الشغل يا موزا ....

موزا قالها هو انتي لحقتي ...دا انتي بقالك اسبوع بس ....

طب بس احكيلي ايه الي حصل ؟؟؟؟؟

ردت نوفا ... و لا حاجه ...مديري طلب مني ابعت جواب لسفارة اليابان علشان المهندسين الي هيسافرو ...وكتبت الجواب لكن مراجعتش عليه .... فكتبت كلمة اليابان غلط .... و ايه يعني لما اغلط يعني .... هي اخر الدنيا يعني ...وبعدين لو غلط يعني ... منبعت جواب تاني متصلح ....ايه المشكله هي نهاية العالم ؟؟؟؟؟

المصيبة ان سكرتير القنصل اتصل اتريق علينا و قال ...ايه معندكوش منتج مكتوب عليه صنع في اليابان ... و طبعا رفض الجواب.

طبعا موزا ما صدق ..... نزل ضحك ...

مش عارفه تكبي اليابان .... فيه كده ؟؟؟؟؟

طب يعني دلوقت اعمل ايه ....موزا قعد معاها و استرجع كل مهاراته التدريسية .. و مهاراته اللغويه كمان وعلي غير عادته استقطع من وقته الثمين وقعد يعلم نوفا تعمل ايه ؟؟؟؟

بصي يا نوفا .....

1- في المراسلات الرسمية ...لازم تكون صحيحه 100% سواء من ناحية الشكل و المضمون و اللغة ..الخ.

2- لازم نكتب تاريخ اليوم الي صدر فيه الجواب من المؤسسة ( يعني اليوم الي بعتنا فيه الجواب).

3- نكتب موضوع الرساله ( العنوان يعني الي عايزين نتكلم فيه)

4- لازم نتأكد قبل ما نبعت الجواب هنبعت لمين بالظبط ( يعني نعرف أسمه ووظيفته ) حتي لو كلفنا الأمر اننا نتصل بالجهة الي هنبعتلها الخطاب و نتأكد من الأسم و الوظيفه .

5- و نبتدي الخطاب بتحية واسم الي باعتينله الخطاب أو وظيفته .

6- نمشي بمبدأ خير الكلام ما قل ودل يعني نخش في الموضوع من غير ما نطول.

7- الجواب غالبا بيكون 3 فقرات أو أكثر علي حسب الموضوع .

8- الفقرة الأولي شرح عام عن المؤسسة بيتكلم عن شركتنا مين في 3 سطور كده .

9- الفقره الي بعدها الموضوع الي احنا عايزين نتكلم فيه .

10- الفقره الاخيره شكر لطيف مع انتظار الرد .

11- التوقيع ...( دا موضوع مهم ) لان التوقيع غالبا بيكون الاسم و تحته الوظيفة وتحته ارقام التليفون و تحتها البريد الألكتروني و بعدهم الموقع الألكتروني لو موجود ( أحيانا بعض الشركات بتحط صورة اللوجو بتاعها).

12- الجواب لازم يتراجع مره و اثنين و ثلاثه واربعه لو امكن قبل ما نطبعة.

غير كل دا ....اقري يا نوفا...... علشان تتعلمي ...يعني ادخلي علي الأنترنت و اعملي بحث عن طريقة كتابة المراسلات الرسمية .... و شوفي اشكالها ايه و من هنا هتتعلمي ازاي تكتبي خطابات رسمية ...و التكرار يا نوفا ...بيعلم ايه؟؟؟؟

طب يا موزا دلوقت اعمل ايه؟؟؟؟ و لا حاجه يا نوفا ابتدي من جديد ....هو انتي بتغلبي ؟؟؟هههههههههه

و احمدي ربنا انهم مبعتوش جيش ساموراي ...يغتالك

بصتلوا نوفا بغيظ ...... ماشي يا موزا ....ماشي

و استنو باقي الخناقشات ......