خناقشة ...علي 1000 جنية
موزا ..صحي يوم الجمعة و بعد مج الشاي بالبن المحترم ... و الدش المتين ... راح يصلي الجمعة ... و كمل اليوم واقف مع اصحابه علي ناصية البيت .... يجيبو في سيرة دي ... و يبصو علي دي ... يلا شباب فرحان بنفسه ما علينا .
بعد الغدا الي عملاه ماما .... نزل يلعب كوره ... و رجع اكيد محتاج دش .... و نزل يكمل قاعده علي القهوة ...يلعب استيميشن ..... الاستيميشن دي موضوع فعلا كبير.... اكتر حاجه نلاحظها في حياة موزا .... النظام و الترتيب ... يعني الحقيقه مرتب وقته بشكل رائع .... !!!!
انتو عارفين موزا عنده كام سنه؟؟؟؟
نوفا ... يا عيني مطحونة لسه يا قلبي متخرجه السنادي ... و اشتغلت في كول سنتر .... ابتدت معاهم تلي ماركتينج ... ونقلت بعد كده علي خدمة عملاء .... دا غير انها بتاخد كورسات انجليزي و كمبيوتر ... مش قلتلكم بنت بميت راجل ...
المهم موزا قابل نوفا .... و قالها ما تشوفيلي شغلانه معاكي ....
طبعا نوفا قلبها قلب خسايه ....
قالتله طب يا موزا اخبار الانجليزي ايه؟؟؟
قالها ...ايه يا بنتي دا انا في كليه انجليزي انتي ناسيه و لا ايه؟؟؟؟؟ بس انا بعرف اقرا و اكتب لكن مشكلتي في الكلام !!!
طيب يا موزا .... بلاها الانجليزي ... الكمبيوتر باه ؟؟؟؟
لاااااا الكمبيوتر دا مفيهوش مشكله خالص .... انا بعرف كمبيوتر كويس جدا ...
طيب يا موزا الحمد لله ... تعرف ورد يعني و اكسل و كده ...و لا ليك في البرمجه و الكلام دا ...
مين ورد و اكسل دا يا نوفا .... انا بعرف الانترنت ... و بتفرج علي اليو تيوب ...و بعمل شات ... يعني تمام
طبعا نوفا ... عنيها وسعت .... طيب مش مشكله نتعلم ... اقولك عندي حاجه لطيفه ايه رايك تشتغل خدمة عملاء زيي... انت ولد لبق و تعرف تعمل الشغلانه دي ....
يا نوفا يعني افضل طول النهار علي ارد علي تليفونات .... اقولك طيب مش مشكله ....
نوفا كلمت رئيسها .... قالت كلمتين حلوين علي موزا .... رئيسها قالها طيب ...خليه بكره يجي يقابلني....
تاني يوم ...اخر النهار ...نوفا كلمت موزا ... ها عملت ايه....
رد موزا وقال ....... انا رحت ... و عملت المقابله ... و اتقبلت ....بس انا مش رايح ....
ليه يا ابني ؟؟؟؟
اصل المرتب 1000 جنيه بس ....
طب ايه المشكلة .... متبتدي و تاخد خبره و قريب من بيتك ...عايز ايه تاني ....
لا يا نوفا المرتب قليل جدا .... امال انت عايز تشتغل بكام ؟؟؟؟
مش اقل من 2000 جنيه ... دا غير التامينات ...و يا ريت يكون فيه عربيه ...
بصتله نوفا ... و معرفتش تقول ايه .... بس علشان الضغط ميعلاش ....
انسحبت في هدوء قبل ما ترتكب جريمة قتل مع سبق الاصرار و الترصد
و استنو باقي الخناقشات .....
ههههههههههههه
ردحذفبجد ربنا يكون فى عون نوفا
وعلى فكرة المشهد ده بيتكرر كتير ما بين الشباب اللى بيتلكك عالمرتب وعايز يقعد على مكتب ومش عارفة ايه
وبجد تسلم افكارك يا أ رشا
تقبلى مرورى
مش الـ 1000 جنية احسن من قعدة البيت و ياخد مصروف من ماما و بابا
ردحذفمش يحمد ربنا انه اتقبل فى شغل بس 1000 جنيه فى بداية الشغل حلوه جدا
جميل ربنا يكرمك يارب
ردحذفياسر راتب