ولا يهمني برضه سعيد فرحان مبتهج

تدويناتي


يوم الأجازه أخذت الكرسي و كتابي المفضل ومج النسكافيه ... وكالعادة نزلت اقعد في الحديقة امام منزلي ، سبحان الله مع انها حديقه عامه و خاليه من اي شيء إلا بعض الشجيرات الصغيره و نجيل و لكن رائحة الخضرة تشعرك بالراحة والهدؤ ...ومع اننا مش في الارياف إلا انني احيانا اقابل السيد ابو قردان ... طائر فعلا جميل ... مبتشوفش ابو قردان غير مع الخضره و لونه ابيض في وسط الجناين بيكون فعلا شكله جميل ... المهم في اليوم دا قعدت و ابتديت اقرا و بين السطور عقلي يشت بعيد ... مع ان الجمال دا كله حوالينا طب احنا زعلانين ليه؟؟؟؟
ليه دايما مخنوقين ؟؟؟؟ بجد مش عارفه ليه؟؟؟؟
بجد مفيش حد عاجبه حاله ...

الي امنية جياتها تحب و تتحب ..... تلاقي الحب تزن علشان تتجوز .... تتجوز .......تزن علشان عايزه و لاد .....تخلف ... تبتدي تلعن الدنيا و العيشه و الي عايشينها علشان الامكانيات مش مكفيه ... و تعبت من قرف الولاد و البيت و ابوهم.... هو مش دا الي انتي كنتي عايزاه ؟؟؟ عايزه ايه تاني ...؟؟؟!!!

الي نفسه يشتغل .... يشتغل .... يزن علشان يترقي ...... يترقي ...... طب عربيه بقي ..... جبنا العربيه .... طب شقه ... اشتريناها .... طب ممكن بقي انيس لوحدتي ..... جبنالك بنت الحلال الي تراعيك و تصون بيتك ....... يبتدي يلعن العيشه و الي عايشينها اصل المدام طلباتها كتير ... و مديري حافظ مش فاهم ... ايه هو انا مكنه ... مفيش كده.... طب مش انت الي كنت عايز تشتغل و تكبر و تفتح بيت ؟؟؟!!!

و حكايات كتير كتير بقابلها كل يوم

الي يقولي مش دا الي كنت بحلم بيه ......و الي يقول انا زي الثور الي بيدور في ساقيه .....و الي يقولك اصل البلد بقت زحمة...... يا ه في ايه يا جماعة ... منعيش انهارده نستمتع بيه و نفرح ... و هي الراحة ليها طعم غير بعد التعب ... ولا الشبع هنحس بحلاوته من غير جوع؟؟؟؟

افتكرت مقولة الأمام حسن البصري ......سئل الحسن البصرى عن سر زهده فى الدنيا فقال أربعة أشياء: علمت أن رزقى لا يأخذه غيرى فاطمأن قلبى، وعلمت أن عملى لا يقوم به غيرى فاشتغلت به وحدى، وعلمت أن الله مطلع علي فاستحييت أن يرانى عاصيا، وعلمت أن الموت ينتظرنى فأعددت الزاد للقاء ربى.

ايه يا جماعة الموضوع سهل اهه طب محبطين ليه؟؟؟؟؟

قريت النهارده 12طريقه علشان منبقاش محبطين ... متيجو ننفذهم مع بعض و من النهارده يبقي لا و الف لا
للاحباط
كب هنعمل ايه ؟؟؟؟؟ بسيطه خالص

1-نروح كده نروق بالنا في مكان مريح وهادئ
2 ـ مم كن ناخد جلسات اسرخاء مع اتباع عملية التنفس بأخذ شهيق عميق وزفير بطيء
3 ـ أكلم صديقي وأفرغ شحنة الاحباط معاه؟
4 ـ حسن الظن بالله والدعاءمنه مع محاولة البكاء لانه يريج الضمير يسلى القلب
5 - أروح كده مكان مبهج اتفسح و افرفش؟
6 ـ تدريب الذات على الصبر والتحمل و استيعاب المشاكل
7-مفيش مستحيل علي فكره و أذا عرف السبب بطل العجب ... مهم نعرف اسباب المشاكل ايه ؟؟؟ صدقوني هنوصل لحلها.
8- يكون عندي هوايه بحبها ...ازرع ، أقرا ، ابدع ... كده يعني.
9- الي يشوف بلاوي الناس تهون عليه بلوته ..... فكر في مشاكل الناس ... هتحس قد ايه انت محظوظ لانك مش زيهم.
10- شوف ازاي ناس كتير واجهو صعاب و عدوها .... و الي فيه عين وراس يعمل زي ما عملو الناس.
11- ربنا ادانا نعمة كبيره و هي الصحة ... نحافظ عليها بقي ... ننام كويس ،نلعب رياضه حتي لو كان مشي لمده نص ساعة ، ناكل كويس .... و مش هوصيكو علي الباقي.
12- اتكلم بقي مع نفسي و اقولها اني هعمل من الفشل نجاح .

ها اتفقنا .... هنقول لا للاحباط ؟؟؟؟ ولا هنعمل ايه؟؟؟؟؟؟ مستنيه اعرف رايكم
رشا خليفة


هناك تعليق واحد:

  1. نصائح جمييييييييييلة وسهلة ورااااااااااائعة
    بس يارب التنفيذ
    وعلى اللهِ التساهيل :D

    ربنا يكرمك ياجميلة ويجازيكي خير يارب

    ردحذف