و ايه يعني ....35؟؟؟؟!!!!!!

تدويناتي


الكام يوم الي فاتو كان فيهم احداث كتير ... بس ايه الي خلاني اكتب النهارده ؟؟؟؟ مش هطول عليكو هحكيلكو الحكايه باختصار ...
و انا راجعة من الشغل في ثاني يوم رمضان ... قلت اسلي صيامي و اشغل الراديو ، لقيت خير الله ما جعله خير برنامج اسمه حكايه كبيره، القصة قصة مروه الي أصحابها بيقولولها يا موري ، كل يوم تشرب فنجان القهوة باللبن و بعد كده تروح شغلها و طول 10 سنين اتنقلت من شغلانه لشغلانه ...مروه حققت الي هي عايزاه .. شغل و سفر و فلوس و كله تمام ... لحد دلوقت مفيش مشكله امال فيه ايه؟؟؟؟؟

انهارده عيد ميلادها ال 35 ... المهم افتكرت انها لحد دلوقت مبقتش مدام مروه ... غيرت لبسها و عملت نيو لوك و راحت عالنادي تدور علي ابن الحلال .... تصدقو لقيتهم كلهم مش عايزين يتجوزو ... دا غير بقي حكايات الطلاق والي متجوزه في ايجار جديد و الي مش عارفه تدفع مصاريف مدارس الولاد .... مروه يا عيني بعد الي شافته دا قررت انها ترحع للي كانت عليه .... فنجان قهوة الصبح و شغلها خروجها مع اصحابها و حياتها و رضيت بنصيبها و حياتها .

كل الي بقوله دا كان مقدمه لسه مدخلناش في الموضوع .... امال ايه الموضوع ... الموضوع هو حكايتي انا
صحيح انا لسه موصلتش لل 35 بس ، كمان كام يوم هتم ال 34 قربت يعني ...الكام يوم الي فاتو حصل فيهم كتير ....
احكيلكو بقي ايه الي جري .....

في الاول ... انا شخصية متفرقش كتير عن مروه .... طول ال 13 سنه الي فاتو اتنقلت من مكان لمكان .. كورسات وشغل و بيني و بينكم .... هو دا الحاجه الوحيده الي بعرف اعملها ... اشتغل و أذاكر .

المهم خير الهم اجعله خير ... و بعد طول غياب اتحقق حلمي فاني اشتغل علاقات عامه دا كان نفسي فيه من زمان وبعدها لقيت شركتين كنت مقدمه فيهم بيتصلوا بيا علشان يسالوني ابتدي معاهم من امتي .... ياه كله كده في كام يوم .. وايه بقي لقيت واحده صحبتي بقالها كتيييييييير مكلمتنيش بتقولي جايبالك عريس..... واو ايه دا هو كله كده بيجي مره واحده و لا ايه؟؟؟؟ شغل و عريس ... يا سلام.. كله جالك اختاري بقي.....

المهم قلت اوك انا مسافره مع اهلي يويمن لما ارجع بقي اشوف ايه النظام ... و اهي فرصه ان الواحد يفكر في كل دا.
رجعت صحبتي اتصلت بيا .... ها العريس عايز يقابلك .... طب و ماله حددي معاد ....

طب هو عايز يجي البيت ... و لا عايز ايه حضرته .... لا هو عايز يشوفك و لو فيه قبول يجي البيت .... و ماله طيب حددنا المعاد .... و في الطريق استحضرت كل الي اتعلمته في مهارات الاتصال ... و الاجابات الدبلوماسيه .... والعلاقات العامه .... و رحت قابلته ....

الباشا عايش بره مصر و اتجوز مرتين من اجانب و فجاه فكر في بنت بلده ... و ماله ..

عنده ولد و بنت بس عايشين مع امهاتهم .... يلا معلش يمكن محصلش نصيب ...

طب انتي ممكن تعيشي بره .... ممكن طالما هنيجي نزور اهلي كل مده أو اهلي يزرونا ....

طب هتعملي ايه في الفراغ ... لا منا هشتغل عادي يعني ...

طب و الحجاب .... الحقيقه انا مقتنعه بيه و مش هقلع الحجاب....

علي فكره انا معجب جدا بطريقة تفكيرك .... ميرسي دا بس من زوقك ...

طيب هقوم بقي علشان متاخرش .... و انا هكلمك ان شاء الله...
أن شاء الله ....

استني انه يتصل مفيش .... صحبتي تتصل تسالني ... قلتلها محدش كلمني

و في يوم لقيتها بتتصل بيا .... علي فكره هو معجب جدا بطريقه تفكيرك ... و شكلك حلو وملامحك جميله ... بس .... هو فيه بس ... بس ايه؟؟؟؟؟

دا قالي سيبي اهلك قلتله وماله ... كملي دراستك بره ... اوك ....مش هرجع اعيش في مصر .... طيب .. متجوز مرتين ... معلش .... عندي ولاد .... و ماله .... اكبر منك ب 10 سنين .... فرق السن مش مشكله ....
كل دا و فيه بس .... اه يا جبيبتي معلش .... اصله خايف لا تتخني بعد الزواج .... ايه؟؟؟؟ بتقولي ايه؟؟؟؟
و قفلت السكه .........

موقف حقير الواحد بيتحط فيه .... واحد يجي يعاين البضاعة .... و يشوف عجباه ماشي ... فيه عيوب .........لا اخلع.
و لا بقي واحد حب و غرام .....و انتي الامل و المني .... و في الاخر يلاقي فرصه احسن ... طب معطلكيش.
الواحد يعمل ايه؟؟؟؟ يصاحب و يقضيها ؟؟؟ يتقال عنها سهله و متنفعش للجواز ....
تستني العدل ؟؟؟؟ كل من هب و دب يجي يتشرط ....

تسكت و تعمل نفسها مش واخده بالها؟؟؟؟ كل الي يشوف وشها يبصلها بحسره ... ربنا يرزقك يا حبيبتي بابن الحلا...
بس .... كفايه بقي ....

مش هعمل كده تاني ..... مش هرتبط بحد يجرحني بعد شويه اصله شايفني سهله .... و لا هسمح لحد يبيع و يشتري فيا علشان هو راجل .... و مش هسمح لحد يتصعب عليا .....

انتو ليه مبتبصوش لنجاحي في شغلي .... ليه مبتبصوش اني من غير مساعده من حد حققت الي انا عايزاه ... وحيده ... أه ...وحيده و محتاجه لحد يطبطب عليا و يمسح دموعي .ز أه محتاجه مش هنكر... بس مش محتاجه لحد يمسح دموعي بايد ... و يجرحني بالايد التانيه ....

هي دي أنا ... و بحبني كده

هناك 4 تعليقات:

  1. يا رشا يا جامد
    لأحقيقي دستي عالجرح يا حبي
    تلت تربع البنات عندها نفس الازمة الازلية دي...
    وفي النهاية الواحد مش بأيدة غير انة يعمل اللي علية ويسبها علي الله...
    لأني اكتشفت انها في النهاية (نـصــيـــب)


    مبروك عالمدونة يا وزتي: بعشق القالب ده قوي..

    ردحذف
  2. اهنيكى على المدونة وشكلها الجميل
    والموضوع اللى فعلا بقى ازمة

    الكل بيبص على الشكل دلوقتى ومحدش بيشوف دماغها ونجاحتها
    عندى اصحاب كتير اتجوزا بس عشان ضل راجل ولا ضل حيطة
    بس انا عندى ضل الحيطة احسن لان ده مش حتى بيحصل ضل الراجل
    فعلا جيتى على الجرح
    نفسي اللى رايح يتجوز يبص على بيتقدملها على انها هاتبقى ام فى المستقبل يعنى هى هاتربي وتعلم يعنى مش مهم شكلها ايه المهم دماغها
    ربنا يرزق البنات كلها بالزوج الصالح والذرية الصالحة

    ردحذف
  3. السلام عليكم
    اولا مبروك على المدونة دا ان ما كنت متأخر
    ثانيا احييكي من كل قلبي على المدونة
    ثالثا فعلا انا عاوز اتكلم معاكي بخصوص محتوى المدونة لاني كنت هاكتب في نفس المجال لكن الوقت مشكلتي
    اخوكي Dr.Virus صاحب مدونة الحماية
    http://dr-virus.blogspot.com
    ايميلي موجود في المدونة لو وافقتي اننا نتكلم اكيد هاضيفي ايميلي
    ممكن تحذفي التعليق بعد ما تقرأيه
    على فكرة انا مش بطلب الطلب ده للهزار ولا لتضيع الوقت ولكني فعلا محتاج اتكلم مع اي حد مش شرط بنت بس لازم يكون مستوى تفكيره زيك وربنا يوفقك ان شاء الله
    تحياتي....

    ردحذف
  4. يمكن يكون تعليقى جه متأخر بس انا لسه عارفه عن الجروب ده متأخر .المهم المشكله يا رشا مش فى اللى جاى يعاين البضاعه ويبص بصه ويمشى المشكله الاكبر لما يتعطف عليكى ويوافق يرتبط بيكى وعليها يعتقد اهللك انك لو رفضتى مش حتلاقى غيره وان الحال واقف وان كان مش بيقولها بالمعنى الحرفى وعلى المدارى وانك لازم تستحمليه وانك انت اللى تقدرى تغيريه وانت الست وانت وانت وانت وبقدرة قادر تلاقى نفسك بقيتى مسؤوله عن كل حاجه وسيدته داخل بدور البطوله بس ممن غير تعب ليه المطلوب ان انا بس اللى استحمل وانا بس اللى اغيره وانا بس اللى ادى ليه مافيش قاعدة التبادل مع ان الاصل ان البنات والستات هما اللى ياخدوا العواطف والرسول الكريم قال رفقا بالقوارير انا حاسه ان هما اللى بقوا قوارير واخيرا اشكو اليك يارب

    ردحذف